ankhon men raha dil men utar kar nahin dekha

ankhon men raha dil men utar kar nahin dekha
kashti ke musafir ne samundar nahin dekha

be-vaqt agar jaun ga sab chaunk parenge
ik umr hui din men kabhi ghar nahin dekha

jis din se chala huun miri manzil pe nazar hai
ankhon ne kabhi meel ka patthar nahin dekha

ye phool mujhe koi virasat men mile hain
tum ne mira kanton bhara bistar nahin dekha

yaron ki mohabbat ka yaqin kar liya main ne
phulon men chhupaya hua ḳhanjar nahin dekha

mahbub ka ghar ho ki buzurgon ki zaminen
jo chhor diya phir use mur kar nahin dekha

ḳhat aisa likha hai ki nagine se jare hain
vo haath ki jis ne koi zevar nahin dekha

patthar mujhe kahta hai mira chahne vaala
main mom huun us ne mujhe chhu kar nahin dekha

Bashir Badr

موضوعات