دشتِ گمنام سے آیا ہوں سرِ شام ابھی
خیمہِ عشق لگاؤں گا میں گمنام ابھی
جام پہ جام نہ دے ساقی ذرا دیر ٹھہر
بھر کے پی لوں گا تو مچ جائے گا کہرام ابھی
اے غمِ ہجر تو جی بھر کے مری عمر گزار
بند ہیں مجھ پہ عطاؤں کے در و بام ابھی
توسنِ فکر کو اظہار کی طاقت دے کر
اس کو پہنچاؤں گا اے دل ترا پیغام ابھی
مجھ کو جی بھر کے محبت کا مزہ لینے دے
سامنے آ نہ مرے گردشِ ایام ابھی
زائرِ عشق ہوں میں قیس کا درباری بھی
ملنے آتے ہیں مجھے عشق کے ناکام ابھی
ہم نے دیوان پہ دیوان لکھے ہیں یاسر
تم کہ لکھ پائے نہ اک نامہِ بے نام ابھی
یاسر عباس فراز