جب ہُوا عرفاں تو غم آرامِ جاں بنتا گیا
سوزِ جاناں دل میں سوزِ دِیگراں بنتا گیا
رفتہ رفتہ منقلِب ہوتی گئی رسمِ چمن
دِھیرے دِھیرے نغمۂ دل بھی فُغاں بنتا گیا
میں اکیلا ہی چلا تھا جانِبِ منزِل مگر
لوگ ساتھ آتے گئے اور کارواں بنتا گیا
میں تو جب مانوں کہ بھردے ساغرِ ہر خاص و عام
یوں تو جا آیا وہی پِیرِ مُغاں بنتا گیا
جِس طرف بھی چل پڑے ہم آبلہ پایانِ شوق
خار سے گُل اور گُل سے گُلستاں بنتا گیا
دہر میں مجروحؔ کویٔ جاوِداں مضموں کہاں
میں جِسے چُھوتا گیا وہ جاوِداں بنتا گیا
مجروح سلطان پوری